სადღესასწაულო პროგრამის ფარგლებში მთელი დღის განმავლობაში მრავალფეროვანი კულტურული და სპორტული აქტივობები გაიმართა.
საზეიმო ღონისძიებას ქალაქ მცხეთაში წელს პირველად უმასპინძლა ანტიოქიის ქუჩამ, სადაც მოწყობილი იყო სანახაობითი ატრაქციები, საგამოფენო, ისტორიული, სადეგუსტაციო, ეთნოგრაფიულ-თემატური, არქეოლოგიური, საბავშვო-გასართობი სივრცეები და ფოტოზონები. ჩატარდა მცხეთის მუნიციპალიტეტისა და მცხეთა-მთიანეთის რეგიონის ფოლკლორული, ქორეოგრაფიული და ხალხური ანსამბლების კონცერტი, ასევე მასტერკლასები, თეატრალიზებული წარმოდგენები, შემეცნებით-საგანმანათლებლო და ქართულ წეს-ჩვეულებათა იმიტირებული აქტივობები, ინტელექტუალური თამაშები და სახალხო შეჯიბრებები.
დამსწრე საზოგადოებას სიტყვით მიმართეს და დღესაწაული მიულოცეს მცხეთის მუნიციპალიტეტის მერის მოვალეობის შემსრულებელმა, გივი გიუტაშვილმა, მცხეთა-მთიანეთის დელეგატმა, დიმიტრი ხუნდაძემ და მხარის სახელმწიფო რწმუნებულმა, ლევან ზაუტაშვილმა.
პროფესიულ საქმიანობაში შეტანილი განსაკუთრებული წვლილისთვის მცხეთის 2026 წლის საპატიო მოქალაქის წოდება მიენიჭათ: ქართველ პოეტსა და საზოგადო მოღვაწეს, ტარიელ ხარხელაურს, სპორტის დამსახურებულ ოსტატს, ღვაწლმოსილ მწვრთნელს, ნიკოლოზ გირდას, მცხეთის ტურიზმის განვითარების ცენტრის ხელმძღვანელს, ლალი რევიას, მცხეთის მუნიციპალიტეტის კეთილმოწყობის სამსახურის ღვაწლმოსილ თანამშრომელს, გოზალა ჩოლოევს, მეან-გინეკოლოგს, მედიცინის მეცნიერებათა დოქტორს, დავით გაგუას და არქიმანდრიტს, ილია ნასიძეს.
ღონისძიება დასრულდა გალაკონცერტით, რომელშიც მონაწილეობდნენ თბილისის ბიგ-ბენდი, ჯგუფი ,,რეგიონი’’, სტატუს ბენდი და დიჯეი არკანი.
„მცხეთობა-სვეტიცხოვლობის“ აღსანიშნავ ღონისძიებას მცხეთა-მთიანეთის რეგიონში შემავალი მუნიციპალიტეტების ხელმძღვანელი პირები და თვითმმართველობის სხვა წარმომადგენლები ესწრებოდნენ.
დღესასწაულზე ასევე იმყოფებოდნენ მცხეთასთან დამეგობრებული ქალაქების ხელმძღვანელი პირები და ხელისუფლების წარმომადგენლები გერმანიიდან, პოლონეთიდან, უკრაინიდან, ლიეტუვიდან, ბელარუსიდან, სომხეთიდან და ლატვიიდან.
