9 აგვისტოს, მცხეთის მუნიციპალიტეტის მერის პირველი მოადგილე გივი გიუტაშვილი ინფრასტრუქტურის განყოფილების უფროს რევაზ ელოშვილთან, ინფრასტრუქტურულ პროექტებზე ზედამხედველობის განყოფილების უფროს მერაბ თუხარელთან, მერის წარმომადგენელ ზურაბ იმერლიშვილთან, ა(ა)იპ სკოლამდელი აღზრდის დაწესებულებათა გაერთიანების დირექტორ გოჩა ქავთარაძესთან და შესაბამისი სამსახურების სხვა წარმომადგენლებთან ერთად ნატახტრის საბავშვო ბაღს ესტუმრა, დასრულებული სამშენებლო სამუშაოები დაათვალიერა და აღნიშნა, რომ იგი ერთ-ერთი საუკეთესო აშენებული საბავშვო ბაღია მუნიციპალიტეტში აშენებულ ბაღებს შორის, რომელიც ყველა მოთხოვნას აკმაყოფილებს.

2008 წლის რუსეთ-საქართველოს ომიდან 10 წელი გავიდა. მცხეთის მუნიციპალიტეტის მერმა გიორგი კაპანაძემ, მცხეთის მაჟორიტარმა დეპუტატმა დიმიტრი ხუნდაძემ, საკრებულოს თავმჯდომარე გელა ბაქრაძემ და საკრებულოს წევრმა ჯონდო მუზაშვილმა მუნიციპალიტეტის თანამშრომლებთან ერთად , აგვისტოს ომში დაღუპულთა ხსოვნას პატივი მიაგეს და გმირთა მემორიალები და საფლავები ყვავილების გვირგვინით შეამკეს. დაღუპული ჯარისკაცების ოჯახის წევრებს შეხვდნენ და მიუსამძიმრეს. ომში გარდაცვლილთა საფლავებთან და მემორიალებთან მათი სულის მოსახსენიებელი პარაკლისი აღევლინა.

27 ივლისს მცხეთაში სამუშაო ვიზიტით იმყოფებოდნენ ბულგარეთის რესპუბლიკის სრულუფლებიანი ელჩი საქართველოში ქალბატონი დესისლავა ივანოვა და ელჩის მოადგილე, ბატონი დანჩო მიტჩევი. ვიზიტი მიზნად ისახავდა სამომავლო თანამშრომლობას ბულგარეთის რესპუბლიკის ნესებირის მუნიციპალიტეტისა და მცხეთის მუნიციპალიტეტს შორის.

ილია ჭავჭავაძის საგურამოს სახელმწიფო მუზეუმში „ილიაობის“ დღესასწაული აღინიშნა. უკვე მეხუთე წელია მუზეუმში ეს დღე განახლებული ფორმატით აღინიშნება. ყოველი წლის 2 აგვისტოს, ილიას სახლის მასპინძლები საქართველოს სხვადასხვა რეგიონიდან ჩამოსული სტუმრები ხდებიან, რომლებიც თავიანთი მხარის ფოლკლორს, მხატვრობას, თეატრს და პოეზიას წარადგენენ. აჭარის, სამეგრელოს, აფხაზეთის და იმერეთის შემდეგ , ილიაობის მასპინძელი გურიის რეგიონი გახლდათ, ნიშნად იმისა რომ ილია ჭავჭავაძე ერთიანი საქართველოს სიმბოლოა და მისი სახლი სრულიად საქართელოს სახლია. წლევანდელი 2 აგვისტო, ილიას მუზეუმში მრვალფეროვანი ღონისძიებით აღინიშნა. გურიის რეგიონმა საინტერესო თეატრალური და სასიმღერო ნომრები წარადგინა, ინტეგრირებული თეატრი „აზდაკის ბაღი“ მაყურებლის წინაშე სპექტაკლით „კაცია-ადამიანი?!“ წარსდგა.

26 ივლისს, ა(ა)იპ უფასო სასადილოს ბენეფიციარებს მცხეთის მუნიციპალიტეტის მერის მოადგილე მარინა ზურაბიშვილი, ჯანდაცვისა და სოციალური სამსახურის უფროსი ნინო ჭიჭინაძე, სოციალური განყოფილების უფროსი რაულ ხუბაშვილი და ა(ა)იპ ინვესტიციებისა და ჰუმანიტარული პროექტების გაერთიანების დირექტორი გიორგი ატაშვილი ესტუმრნენ. მცხეთის მუნიციპალიტეტის მერიისა და ა(ა)იპ „ინვესტიციების და ჰუმანიტარული პროექტების გაერთიანების“ ერთობლივი ორგანიზებით მორიგი ჰუმანიტარული აქცია გაიმართა.

ამა წლის 19, 20 ივლისს საქართველოში იაპონიის ქ.ჰიკონეს მერის ვიზიტის ფაგლებში, გაიმართა ორდღიანი შეხვედრა, ქალაქ მცხეთის მუნიციპალიტეტისა და იაპონიის საელჩოს წარმომადგენლებს შორის. შეხვედრა დიდი ხნის წინ დაიგეგმა, რასაც საფუძვლად ედო ორი ქალაქის მცხეთისა და ჰიკონეს დამეგობრების სურვილი. პირველი დღე გაცნობითი ხასიათის გახლდათ, მცხეთს მუნიციპალიტეტის მერი გიორგი კაპანაძე, მოადგილეები: გივი გიუტაშვილი, მარინა ზურაბიშვილი და ოთარ ჩხეიძე ოფიციალური ვიზიტით იაპონიის საელჩოს სტუმრობდნენ. შეხვედრაზე ქართულ-იაპონური ურთიერთობების მნიშვნელობასა და დეტალებზე ისაუბრეს. მეორე დღეს იაპონიის საგანგებო და სრულუფლებიანი ელჩი, მისი აღმატებულება ტადაჰარუ უეჰარა, იაპონიის ქალაქ ჰიკონეს მერი ბატონი ტაკაში ოკუბო და იაპონიის საელჩოს წარმომადგენლები მცხეთას ესტუმრნენ. თავდაპირველად დღის წესრიგის მიხედვით, ოფიციალური შეხვედრა მცხეთის მუნიციპალიტეტის მერიაში გაიმართა. შეხვედრას სტუმრებთან ერთად ესწრებოდნენ მცხეთის მერის მოადგილეები და ასევე მერიის თანამშრომლები. მასპინძლებმა ადგილზე წარადგინეს პრეზენტაცია, რომლის ძირითადი აქცენტები გახლდათ ქ.მცხეთის, როგორც იუნესკოს დაცვის ქვეშ მყოფი ქალაქის განვითარება და პერსპექტივები.

გერმანიის საერთაშორისო თანამშრომლობის საზოგადოება (GIZ) ის "თვითმმართველობის განვითარების პროგრამის" ფარგლებში მცხეთის მუნიციპალიტეტს სომხეთის დელეგაცია ეწვია, რომელიც მცხეთაში ადგილობრივი საფინანსო მენეჯმენტის სფეროში სიახლეებს გაეცნო.

10 ივლისს მცხეთის კულტურის სახლში დიმიტრი ხუნდაძემ მოსახლეობას ანგარიში წარუდგინა. საქართველოს პარლამენტში მცხეთის მუნიციპალიტეტის წარმომადგენელმა საკანონმდებლო უწყებაში 6 წლიანი მუშაობა შეაფასა. ხუნდაძემ დამსწრე საზოგადოებას განხორციელებული პროექტები გააცნო და დარბაზში დასმულ შეკითხვებსაც უპასუხა. შეხვედრაზე, რომელსაც საქართველოს პარლამენტის წევრები, არასამთავრობო ორგანიზაციები და სხვა საპატიო სტუმრები ესწრებოდნენ, სიტყვით გამოვიდნენ პარლამენტში უმრავლესობის ლიდერი არჩილ თალაკვაძე, მცხეთა-მთიანეთის სამხარეო ადმინისტრაციის ხელმძღვანელი ლევან ზაუტაშვილი და მცხეთის მუნიციპალიტეტის მერი გიორგი კაპანაძე.